لحظة تخمام عميقة | نسخة بالعامية الجزائرية ~ بالفصحى قريبا

 

ديفوا نكون واقف في التاقة و نشوف المدينة اون فاص ليا الديار الباطيمات المساجد نهبط عينيا نشوف الناس هذا يساوم هذا يدابز هذاك يسلم واحد يكحل وحدة تتمشى و مبلقا عينيها و لخرا محجبة معلبلهاش بالناس بولحية غادي للمسجد ولا للوطو سيارات غاديين جايين كار يدير لاري و لا مقلع بيسكلات نعلق عينيا في السما نشوف دعوة زرقا و ديفوا غيام بياض تحسبه قطن و طيارة جايزة فوقه سبحان الله
و نقيس عينيا اكثر من هاك للجبال واقفة تحسبهم زعماء
الشيئ اللي محيرني و رجفلي قلبي
يَوْمَ تُبَدَّلُ الْأَرْضُ غَيْرَ الْأَرْضِ وَالسَّمَوَاتُ وَبَرَزُوا لِلَّهِ الْوَاحِدِ الْقَهَّارِ
كي كلشي يتبدل قولولي واش دير واش تخلي لا صلاة كاملة لا صوم كامل مقصر في الواجبات الدينية عاطيها للتكحال و الزطلة و الشراب ديفوا الونا الطياحة و الكفر سب الذات الالهية اللهم اغفر و ارحم كي نخمم بلي  بَلْ تَأْتِيهِمْ بَغْتَةً فَتَبْهَتُهُمْ فَلَا يَسْتَطِيعُونَ رَدَّهَا وَلَا هُمْ يُنْظَرُونَ
انت فقط لوكان دير زبلة نكبروها شوية يحكموك البوليس متبقاش ترجف و تتمنى لكان موصلتش للبوليس
اتخيل يوم الدين مشي بوليس ملائكة شداد غلاظ  يَا أَيُّهَا الَّذِينَ آَمَنُوا قُوا أَنْفُسَكُمْ وَأَهْلِيكُمْ نَارًا وَقُودُهَا النَّاسُ وَالْحِجَارَةُ عَلَيْهَا مَلَائِكَةٌ غِلَاظٌ شِدَادٌ لَا يَعْصُونَ اللَّهَ مَا أَمَرَهُمْ وَيَفْعَلُونَ مَا يُؤْمَرُونَ
و الجريمة تاعك اما صغيرة او كبيرة  يُعْرَفُ الْمُجْرِمُونَ بِسِيمَاهُمْ فَيُؤْخَذُ بِالنَّوَاصِي وَالْأَقْدَامِ

اجماعة انا ما كتبتش هاد الشي باش تقولو امام و لا ملايكة و سمحولي على الدارجة بصح الخوف لازم